1404, 2010

Curso TIC COGAMI

A Confederación Galega de Persoas con Discapacidade (COGAMI) inicia unha nova acción formativa para persoas con discapacidade. Este curso, que é de ámbito galego por ser a distancia, é de Informática e aplicacións especiais para graves afectados. O curso de informática para graves afectados está financiado pola Consellería de Traballo e Benestar-Dirección Xeral da Dependencia e Autonomía Persoal da Xunta de Galicia e mailo Fondo Social Europeo no marco do convenio de Programa de Formación Profesional para persoas con discapacidade física que residan na comunidade galega (PROGRAMA OPERATIVO FSE-GALICIA 2007-2013). A diferenza doutras accións formativas, que teñen por finalidade formar ás persoas con discapacidade para integralas canto antes no mercado laboral, este curso serve, na maioría dos casos, para que os estudantes aprendan a usar programas informáticos específicos que lle van servir para mellorar a súa calidade de vida posto que, na maioría dos casos, son persoas que adoitan estar na casa e mediante a aprendizaxe do manexo do equipo informático teñen a oportunidade de poder comunicarse co mundo a través do ordenador. Algunhas das técnicas que asimilarán neste curso vai depender das necesidades de cada alumno/a, así segundo as capacidades que teñan aprenderán distintos programas, como poden ser de recoñecemento de voz, o emprego de ratos especiais, o manexo do computador a través dos ollos, etc. Algunhas das materias específicas van ser: Axudas Técnicas • Software de Recoñecemento de voz • Outras axudas técnicas Informática • Informática Básica • Internet • Microsoft Word • Microsoft Excel • Microsoft PowerPoint Administración • Técnicas de Comunicación • Xestión Comercial • Xestión Laboral

0802, 2009

Autoformación TADEGA

[D-696] I Cea-Coloquio en torno ao Encerado Dixital Interactivo (CEDI) Dentro do remuíño de ideas que os compañeiros e compañeiras de TADEGa tivemos no fin de curso en Taramundi, expúxose a idea de realizar unha serie de encontros, con mesa e mantel, ao redor dun centro de interese, coa participación dun experto no tema a difundir, dentro das tecnoloxías de atención á diversidade. Seguido coloquio participativo sen mais protocolo que a achega de todos. Di o dito popular que dun casamento sae outro casamento , ao que agora teriamos que engadir , que cada reunión de TADEGa, abre o camiño a un novo proxecto ,e así foi …., da Nosa Asemblea no MUPEGA saíu a semente da primeira Cea “CEDI” a celebrar na Escola de Campos, baixo a incomparable batuta da Mestra Belén Junquera. Foi o 30 de Xaneiro, cando a Escola de Campos, a miña escola, foi visitada por 20 Taguedianos e Tadeguianas. Nunca ata agora unha escola rural fóra escenario dunha Docencia para docentes, onde só a Mestría do Relator cegou a un grupo mixto de expertos, mesturados con mestres peóns, no seu bautizo fronte a un EDI. Todo o meu nerviosismo organizativo esfumouse, cando Belén abriu a caixa das esencias para con naturalidade e dinamismo marabillarnos coa súa sinxeleza, coa cordura dun relato ben trenzado cheo de matices didácticos. que deixaban no aire mil propostas de mil actividades diferentes. Din que o bo Mestre non é aquel que sabe moito , senón o que é capaz de transmitir coñecementos , de buscar aprendizaxes significativos e facer que o todo sexa mais que a suma das partes. Así percorremos Galerías de Imaxes, actividades de deseño, onde a creatividade da mestra abre portas á imaxinación do/a alumno/a, ferramentas para ensinar a facer, ensinar a ser e ensinar a estar, funcións principais, novidades do SMART Notebook 10, Activity Toolkit… e un moi longo etcétera. Tres horas que foron minutos nun clima permanente de maxia e complicidade. O recreo coloquio, con denominación de orixe TADEGa , puxo o broche de ouro a unha xornada de venres, nunha pequena escola que abriu as súas portas ata a madrugada. Ao abrir de nova a escola o Luns resoaban nas súas paredes as palabras máxicas de Belén Junquera, que sensación…unhas palabras resoaron nos meus oídos “ Rapaces, isto é como as Natillas… cando queirades repetimos…” Grazas, grazas TADEGa. Ligazons Documento pdf co resumo do Activity Toolkit.

3001, 2009

Xornada Autismo Galicia

Universidade de Filosofía, Santiago de Compostela, 4:30 da tarde do sábado 13 de Decembro de 2008, día de Santa Lucía. No salón de actos da Facultade tres taguedian@s ante un auditorio convoGcado por Autismo alicia, apáganse as luces e xorden as palabras, seguras e claras, de Juan para cortar o aire con simplicidade poñendo sobre a mesa accesibilidade, usabilidade, colaboración, inclusión… desde a perspectiva de TADEGa como sitio para todas e para todos ónde compartir recursos e ferramentas… onde a única diferenza que nos separa é o nome de acceso e o contrasinal..[D-650-1] Logo Susana, tirando de recursos ante a lei de Murphy, deunos un paseo penso que maxistral, sobre a implicación dunha profesional do ensino , mestra de infantil, no traballo del día a día na aula onde conviven, e aprenden a aprender 11 nenos e nenas diversos/as e diferentes, onde interactúan entre eles para ser e estar compartindo saberes … onde a introdución das TIC na aula, como recurso, amósanos o profundo potencial que teñen na motivación do alumnado na tarefa … Susana deixounos na retina unha pequena mostra dun gran traballo…[D-650-2] Inés, amosounos o outro lado da comunidade de aprendizaxe, meteunos a plan na súa casa, para compartir con nós a dedicación, a implicación e a constancia dunha nai na educación dos seus fillos, cunha traxectoria de traballo por compartir e facer participe ao auditorio a realidade, a visión do mundo aos ollos de Iago, do seu blog, das posibilidades que estes ofrecen, a importancia de non quedar sos na loita, senón de abrir o seu mundo aos demais e facelos participes duna realidade, de loitar pola supresión de barreiras legais en torno ao dereito de uso dos pictogramas, da importancia de poñer a disposición dos nosos fillos e alumnado todas as ferramentas dispoñibles sen deterse polos costos ou, o que é máis triste polas barreiras da burocracia e o copyright… graciñas Inés por compartilo con nós. [D-650-3] Ao final, un amigo, un vello amigo, preguntoume… e ti, que fas aquí? Eu simplemente contestei con orgullo… Eu tamén son de TADEGa. Graciñas aos tres, por ser e estar. Manuel Ligazóns Páxina de Autismo Galicia Páxina de Documentación das Xornadas Autismo Galicia

0107, 2008

Atencion virtual

[D-487] A Unidade Clínico Asistencial de Trastornos de Espectro Autista e Xerais do Desenvolvemento (UCATEA) da Universidade da Coruña está a traballar na avaliación e intervención dirixida a mellorar a calidade de vida dun grupo de familias con persoas con diversidade funcional. Para iso seleccionouse unha mostra inicial de varias familias situadas en distintas ubicacións dentro das provincias da Coruña e Lugo. As diferentes familias formáronse para a utilización do entorno virtual e dotáronse dun equipo informático e conexión a Internet de alta velocidade para que así puideran entrar e ter acceso aos servizos que dende a Universidade se lles ofertan. Isto pódese realizar grazas ao emprego dun contorno virtual deseñado pola Área de e-learning do CESGA en colaboración coa universidade, co que se facilita a realización de actividades relacionadas con todas as dimensións de calidade de vida familiar (Benestar emocional, Saúde física, Benestar económico, Apoios, Produtividade, Relacións e funcionamento familiar, Implicación na comunidade e defensa, Ocio e tempo de lecer e Autodeterminación). Nos últimos meses os profesionais da Universidade de A Coruña están a realizar un proceso de avaliación das diferentes dimensións da calidade de vida deste colectivo. Dentro deste proceso de avaliación plantéxanse múltiples actividades semanais: e-mails con informacións, novas relativas a aspectos fundamentais na vida das persoas con diversidade funcional, discusión mediante foros, sesións de atención individual e grupal a través de chat… A través deste proceso detéctase que aqueles aspectos onde as familias precisan maior apoio están relacionados coas dimensións de Produtividade, Saúde física e apoios para as familias e as persoas con diversidade funcional. Proximamente vaise traballar nun programa de atención familiar a través da utilización do contorno virtual. Tras este período de intervención realizarase unha avaliación das ferramentas virtuais empregadas para determinar en que medida a o programa de atención virtual pode mellorar a calidade de vida destas familias. Para máis información sobre este traballo de investigación, póñase en contacto co coordinador do proxecto na Universidade de A Coruña (Manoel Baña Castro mbcastro@udc.es, ucatea.intervencion@udc.es) ou coa Área de e-learning do Cesga (e-learning@cesga.es) ou ben visitando a páxina web oficial http://diversidade.cesga.es/.