Historia

Relatos da historia de TADEGa, dos seus membros, anécdotas…

Anagrama dos Obradoiros 2010 en terras de Lugo.

Obradoiros Lugo 2010

0

Xeitos de comunicación

Era unha débeda que tiñamos fai tempo; o achegamento de TADEGa a terras lucenses.

E así foi. Primeiro por terras de Viveiro compartindo con todos e todas experiencias dixitais no ensino. E agora lle toca aos xeitos de nós comunicar.

Anagrama dos Obradoiros 2010 en terras de Lugo.

Pé de medio (e descrición alternativa): Anagrama dos Obradoiros 2010 en terras de Lugo. Unha folla de parra acompaña ao título dos obradoiros en verde e castaño.

O próximo día 10 de decembro, venres, coincidindo coa visualización do conto de Xandre en todos os centros de ensino galegos tal e como dimos conta no artigo anterior desta bitácora, ponse en marcha os Obradoiros 2010 de Lugo cunha serie de intervencións de interese.

Para quen desexe máis información, xuntámosvos no seguinte enlace un documento en formato PDF coa información máis ao detalle e máis datos de interese. Non volo perdades:

10 de decembro, día mundial dos dereitos humanos

0

10 de decembro de 2010

Unha experiencia con Xandre nos centros. A inclusión como dereito educativo

Celebrado o 10 de decembro dende hai tempo (1950, resolución 423-V da asemblea Xeral das Nacións Unidas), o día mundial dos dereitos humanos ten nos centros de ensino un espazo privilexiado mediante a realización de diferentes actividades. Así, o que as Nacións Unidas promulgaron pode tomar corpo nas nosas conciencias e nas nosas aulas.

Pé de media (e descrición alternativa): Vídeo sobre como se fixo Xandre feito cunha presentación de fotos dos distintos momentos. Ao longo da metraxe pódense ler letreiros que suman o seguinte texto: Como se fixo Xandre o elefante sen sombra. Con… moita ilusión, moito agarimo, moito traballo, e… altas doses de pracer estético. Non sería posible sen a colaboración de… Andrés Caamaño, Frank Eijo, Paco Díaz, Rafa Sánchez Agustino, Valentín Torrado, Xavi Seco, Ana, Antón, Luis, Manuel, Mariña, Mauro, Rosa, (e o grupo de Contos). Graciñas, TADEGa.net

Dende a asociación TADEGa enviouse unha proposta a todos os centros do ensino galego: que o día 10 de decembro amosen nas súas aulas o conto: Xandre, o elefante sen sombra. Un conto adaptado, accesible e usable, para espertar en cada un de nós a necesidade da presencia de todas as persoas con ou sen discapacidades. Unha inclusión natural, un xeito de convivir, de ser e de estar.

O conto, como sabedes, está nesta web de Xandre (e dentro del, ver menú principal O conto) así como as actividades, e incluso algún engadido máis (audios, vídeos, textos e debuxos para imprimir, etc.) Tamén se pode mercar a pulseira USB co conto xa grabado á que tamén se pode acceder dende o menú principal desta web.

No caso de querer visualizarse directamente, recoméndase que uns días antes se probe nos mesmos ordenadores para deixar descargado todo o material previamente evitando así conxestións no ancho de banda cando todos os centros se conectasen á vez.

Igual con tanto éxito tirades coa nosa web abaixo, estaría ben, pero faremos canto estea na nosa man para evitar todos os trastornos que podamos.

Graciñas por ser e por estar.

Xa se poden mercar as pulseiras de Xandre

0
Logotipo da tenda virtual de TADEGa.

Logo da tenda virtual de TADEGa.

Finalmente xa están listas para a venda as pulseiras USB igualiñas cas do conto de Xandre pero co conto dentro dela para que a poidades usar en calquera ordenador teña ou non acceso a Internet.

En caso de mal funcionamento da pulseira, contactade coa asociación para a o seu arranxo ou o envío de pulseiras de substitución.

O prezo é de 10 euros a unidade (podéndose mercar de 1 a 10 unidades por sesión) máis 4 euros de gastos de envío.

A venda carece de afán lucrativo 100% xa que o importe recadado destínase aos custos de adquisición, portes, gravado, ensobrado e distribución.

Graciñas por ser e por estar.

  • Enlace para mercar as pulseiras: www.tadega.net/compra.php
Alegoría da inclusón educativa cara aos seus destinatarios máis inmediatos.

PNL sobre a Educación Inclusiva no parlamento Galego

4
Alegoría da inclusión educativa cara aos seus destinatarios máis inmediatos.

Pé de medio (e descrición alternativa): Alegoría da inclusión educativa cara aos seus destinatarios máis inmediatos. Un grupo de nenos e nenas dunha aula miran sorrinte cara a nós ato tempo que teñen debuxado con xiz a palabra 'Gracias'.

Unha PNL (Proposición non de Lei) sobre a Educación Inclusiva no parlamento Galego

Este martes pasado 23 de novembro, ás 21.30 horas aprobouse unha proposición non de lei no Parlamento de Galicia co seguinte encabezamento: Medidas para promover un sistema de educación inclusiva en Galicia para os alumnos con discapacidade en todos os niveis educativos. Foi presentada polo portavoz de educación do Partido Popular, Román Rodríguez, quen explicou o seu principal contido:

  1. Promover a detección temperá das necesidades específicas de apoio educativo, particularmente as asociadas á discapacidade, para iniciar o antes posible as medidas de atención educativa mais axeitadas.
  2. Desenvolver as accións de formación do profesorado que proceda para poder realizar unha atención educativa de calidade sobre os alumnos con necesidades educativas especiais. Os responsables da orientación educativa nos centros e os da inspección educativa deberán, así mesmo dispor dunha oferta formativa coa mesma finalidade.
  3. Promover a cooperación das organizacións representativas das familias de alumnos con necesidades educativas especificas para desenvolver a mellor atención educativa de estes.
  4. Favorecer a participación dos alumnos con necesidades educativas específicas nos programas educativos que se desenvolvan nos centros, tales como ABALAR e PROA, entre outros.
  5. Desenvolver as actuacións necesarias para que a escolarización dos alumnos con necesidades educativas específicas se rexa polos principios de inclusión, promovendo a colaboración con outras administracións ou entidades públicas ou privadas sen animo de lucro, así como de institucións ou asociacións.
  6. Promover a dotación de recursos aos centros que escolarizan alumnos con necesidades educativas específicas para atender axeitadamente a este alumnado.

(Este non é o texto definitivo pois hai que engadir as emendas).

A proposta foi aprobada por unanimidade con algunhas emendas do Bloque Nacionalista Galego, que fixo fincapé na detección precoz na etapa de 0 a 3 anos, a comarcalización do os EOE e unha dura crítica ao Partido Popular polos recortes que está sufrindo o profesorado de apoio.

O Partido Socialista, pola súa banda, tamén apoia a proposta aínda que indica que o que fai falta é un Plan de Educación Inclusiva e critica ao Partido Popular por estar a facer até agora o contrario do que recolle esta proposta.

De onde xorde esta PNL?

Cando a Plataforma España Inclusión estivo no Parlamento Español por causa do tristemente fracasado Pacto Educativo recibimos do Partido Popular de Madrid a promesa de que as nosas demandas serían recollidas nunha PNL en Madrid. Ao pouco recibimos correos informándonos de que esa proposta saíra adiante por unanimidade na capital de España. Decidimos pois que sería bo trasladala ás distintas comunidades, polo menos ás que tiñamos ao noso alcance. Esther Cadrado e eu como representantes da Plataforma e Por Dereito puxémonos en contacto con deputados galegos que nos apoiasen e eles á súa vez buscaron o apoio doutras asociacións proinclusivas como Síndrome de Down e Cermi Galicia. Tras varias reunións este foi o resultado. Tiveron ademais a deferencia de convidarnos a asistir de oíntes ao debate desta PNL polo que alí estivemos a compartir o momento con outras mamis doutras asociacións. Ás mamis e papis enchíansenos os ollos de bágoas por momentos.

Sabemos que isto non é máis que un gran de area máis pero moi necesario para seguir avanzando. Ademais que se debata e se fale da Educación Inclusiva nun foro destas magnitudes dá enerxías para seguir avanzando nas nosas loitas pois aínda estamos ao principio dun longo camiño.

Unha reflexión que deberiamos facernos

Se só catro nais fieras de nenos con diversidade funcional fomos as impulsoras da modificación da redacción dun Pacto Educativo de Estado e conseguir que se presente unha PNL sobre Educación Inclusiva en Madrid e outra en Galicia, Que poderiamos conseguir se todos e todas os que queremos unha educación inclusiva de verdade e de calidade no noso país nos fundíramos nun único berro? Alguén se preguntou isto?

Enlaces de Interese

Ir arriba